0:00
/
1ܘܗَܘܹܐ ܠܵܗ̇ ܟܲܕ ܗ̇ܘ ܨܵܠܘܿܝܹܐ ܗ݇ܘܵܐ ܨܠܘܿܬܵܐ ܒܚܕܵܐ ܕܘܼܟܬܵܐ: ܟܲܕ ܦܩܸܕܠܹܗ: ܐَܡܝܼܪܹܗ ܐܸܠܹܗ ܚܲܕَ ܡ̣ܢ ܬܲܠܡܝܼܕܘܼ̈ܗܝ: ܡܵܪܲܢ: ܡܵܠܸܦ ܠܲܢ ܠܨܵܠܘܿܝܹܐ: ܕܵܐܟ̣ܝܼ ܕܐܘܼܦ ܝܘܿܚܲܢܵܢ ܡܘܼܠܸܦܠܹܗ ܠܬܲܠܡܝܼܕܘܼ̈ܗܝ. 2ܘܐَܡܝܼܪܹܗ ܐܸܠܵܝܗܝ: ܐܝܼܡܲܢ ܕܨܵܠܝܼܬܘܿܢ: ܐَܡܘܿܪܘܼܢ: ܒܵܒܲܢ ܕܒܫܡܲܝܵܐ: ܦܵܐܹܫ ܩܘܼܕܫܵܐ ܫܸܡܘܼܟ. ܐܵܬܝܵܐ ܡܲܠܟܘܼܬܘܼܟ. 3ܗܵܘܹܐ ܪܸܙܵܝܘܼܟ: ܐܲܝܟܼ ܕܒܫܡܲܝܵܐ ܐܘܼܦ ܒܐܲܪܥܵܐ. ܗܲܒَܠ ܠܲܢ ܠܲܚܡܵܐ ܕܣܘܼܢܩܵܢܲܢ ܝܵܘܡܵܐ ܒܝܵܘܡܵܢܹ̈ܐ. 4ܘܫܒ̣ܘܿܩ ܠܲܢ ܚܛ̈ܝܼܵܬܲܢ: ܣܵܒܵܒ ܕܐܘܼܦ ܐܲܚܢܲܢ ܟܹܐ ܫܵܒ̣ܩܵܚ ܠܟܠܵܝܗܝ ܕܕܵܝܢܵܢܹ̈ܐ ܝܢܵܐ ܐܸܠܲܢ. ܘܠܵܐ ܡܲܥܒܼܸܪܸܬ ܠܲܢ ܠܓ̰ܘܼܪܵܒܵܐ: ܐܸܠܵܐ ܦܵܪܸܩ ܠܲܢ ܡ̣ܢ ܒܝܼܫܵܐ. 5ܘܐَܡܝܼܪܹܗ ܐܸܠܵܝܗܝ: ܡܵܢܝܼ ܝܠܹܗ ܡܸܢܵܘܟ̣ܘܿܢ ܕܐܝܼܬ ܠܹܗ ܕܵܘܣܬ: ܘܐܵܙܸܠ ܠܟܸܣܠܹܗ ܒܦܲܠܓܹܗ ܕܠܲܝܠܹܐ: ܘܐܵܡܸܪ ܐܸܠܹܗ: ܕܵܘܣܬܝܼ: ܗܲܒَܠ ܠܝܼ ܕܵܝܢܵܐ ܬܠܵܬَ ܓܸܪ̈ܕܲܝܹܐ. 6ܣܵܒܵܒ ܕܕܵܘܣܬ ܐَܬܹܐܠܹܗ ܠܟܸܣܠܝܼ ܡ̣ܢ ܐܘܼܪܚܵܐ: ܘܠܲܝܬ ܠܝܼ ܡܸܢܕܝܼ ܕܡܲܬܒܸܢ ܩܵܕَܡܘܼܗܝ. 7ܘܗ̇ܘ ܡ̣ܢ ܠܓܵܘܵܝܝܼ ܒܸܬ ܓ̰ܲܘܸܒ ܘܐܵܡܸܪ: ܠܵܐ ܡܲܓ̰ܗَܝܼܬܘܿܢ ܠܝܼ: ܐܵܕܝܼܵܐ ܬܲܪܥܵܐ ܕܒ̣ܝܼܪܵܐ ܝܠܹܗ: ܘܝܵܠܕَܝܼ ܥܲܡܝܼ ܒܫܘܝܼܬܵܐ: ܠܹܐ ܡܵܨܸܢ ܩܵܝܡܸܢ ܘܝܵܗَܒܸܢܘܼܟ. 8ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܐܸܢ ܣܵܒܵܒ ܕܕܵܘܣܬܹܗ ܝܠܹܗ ܠܵܐ ܩܵܝܸܡ ܘܝܵܗَܒܸܠ ܠܹܗ: ܐܝܼܢܵܐ ܣܵܒܵܒ ܕܩܘܝܘܼܬܵܐ ܕܦܵܬܹܗ ܒܸܬ ܩܵܝܸܡ ܘܒܸܬ ܝܵܗَܒܸܠ ܠܹܗ ܟܡܵܐ ܕܗܵܘܹܐ ܠܵܙܝܼܡܘܼܗܝ. 9ܘܐܵܢܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܛܠܘܼܒܘܿܢ: ܘܒܸܬ ܦܵܐܹܫ ܝܘܼܗَܒ̣ܵܐ ܐܸܠܵܘܟ̣ܘܿܢ: ܛܥܹܡܘܿܢ: ܘܒܸܬ ܡܲܫَܟ̰ܚܝܼܬܘܿܢ: ܬܲܩܬܸܩܘܿܢ: ܘܒܸܬ ܦܵܐܹܫ ܦܬܝܼܚܵܐ ܐܸܠܵܘܟ̣ܘܿܢ. 10ܣܵܒܵܒ ܟܠ ܕܛܵܠܸܒ ܟܹܐ ܫܵܩܸܠ: ܘܗ̇ܘ ܕܛܵܥܹܐ ܟܹܐ ܡܵܫَܟ̰ܸܚ: ܘܗ̇ܘ ܕܬܲܩܬܸܩ ܟܹܐ ܦܵܐܹܫ ܦܬܝܼܚܵܐ ܐܸܠܹܗ. 11ܣܵܒܵܒ ܐܲܝܢܝܼ ܡܸܢܵܘܟ̣ܘܿܢ ܒܵܒܵܐ ܕܛܵܠܸܒ ܡܸܢܹܗ ܒܪܘܿܢܹܗ ܠܲܚܡܵܐ: ܟܹܐܦܵܐ ܦܵܫܸܛ ܠܹܗ: ܘܐܸܢ ܢܘܼܢܵܐ: ܡ̣ܢ ܓܹܒܵܐ ܕܢܘܼܢܵܐ ܚܘܼܘܹܐ ܦܵܫܸܛ ܠܹܗ. 12ܘܐܸܢ ܒܹܥܬܵܐ ܛܵܠܸܒ ܡܸܢܹܗ: ܗ̇ܘ ܥܵܩܸܪܒ̣ܵܐ ܦܵܫܸܛ ܠܹܗ. 13ܘܐܸܢ ܗܲܕܟ̣ܵܐ ܐܲܚܬܘܿܢ: ܕܒܝܼܫܹ̈ܐ ܝܬܘܿܢ: ܟܹܐ ܝܵܕܥܝܼܬܘܿܢ ܚܲܠܥܲܬܹ̈ܐ ܛܵܒܹ̈ܐ ܠܝܼܵܗَܒ̣ܵܐ ܠܒܢܘܿܢܵܘ̈ܟ̣ܘܿܢ: ܟܡܵܐ ܙܵܘܕܵܐ ܒܵܒܵܘܟ̣ܘܿܢ ܡ̣ܢ ܫܡܲܝܵܐ ܒܸܬ ܝܵܗَܒܸܠ ܪܘܼܚܵܐ ܕܩܘܼܕܫܵܐ ܠܐܵܢܝܼ ܕܛܵܠܒܝܼ ܡܸܢܹܗ. 14ܘܦܵܠܘܿܛܹܐ ܗ݇ܘܵܐ ܕܲܝܘܵܐ ܕܝܼܗ݇ܘܵܐ ܠܲܥܠܵܐ. ܘܗَܘܹܐ ܠܵܗ̇: ܟܲܕ ܦܠܸܛܠܹܗ ܗ̇ܘ ܕܲܝܘܵܐ: ܗܘܼܡܙܸܡܠܹܗ ܗ̇ܘ ܠܲܥܠܵܐ: ܘܥܘܼܓ̰ܸܒܠܗܘܿܢ ܟܸܢܫܹ̈ܐ. 15ܐܝܼܢܵܐ ܐ݇ܢܵܫܹ̈ܐ ܡܸܢܵܝܗܝ ܐَܡܸܪܗܘܿܢ: ܒܒܥܸܠܙܒ̣ܘܿܒ̣ ܪܹܫܵܐ ܕܕܲܝܘܹ̈ܐ ܦܵܠܘܿܛܹܐ ܝܠܹܗ ܕܲܝܘܹ̈ܐ. 16ܘܐ݇ܚܹܪ̈݇ܢܹܐ: ܟܲܕ ܓ̰ܵܪܒܝܼ ܗ݇ܘܵܘ ܠܹܗ: ܢܝܼܫܲܢܩܵܐ ܡ̣ܢ ܫܡܲܝܵܐ ܛܵܠܒܝܼ ܗ݇ܘܵܘ ܡܸܢܹܗ. 17ܐܝܼܢܵܐ ܟܲܕ ܝܵܕܸܥ ܗ݇ܘܵܐ ܚܘܼܫܵܒ̣ܵܝ̈ܗܝ: ܐَܡܝܼܪܹܗ ܐܸܠܵܝܗܝ: ܟܠ ܡܲܠܟܘܼܬܵܐ ܕܦܵܝܫܵܐ ܕܘܼܒܵܪ ܥܲܠ ܓܵܢܘܼܗ̇ ܒܸܬ ܚܵܪܒ̣ܵܐ: ܘܒܲܝܬܵܐ (ܕܝܼܠܹܗ ܕܘܼܒܵܪ) ܥܲܠ ܒܲܝܬܵܐ: ܟܹܐ ܢܵܦܸܠ. 18ܘܐܸܢ ܣܵܛܵܢܵܐ ܥܲܠ ܓܵܢܹܗ ܦܸܫܠܹܗ ܕܘܼܒܵܪ: ܕܵܐܟ̣ܝܼ ܒܸܬ ܟܵܠܝܵܐ ܡܲܠܟܘܼܬܹܗ: ܣܵܒܵܒ ܕܒܹܐܡܵܪܵܐ ܝܬܘܿܢ ܒܒܥܸܠܙܒ̣ܘܿܒ̣ ܦܵܠܘܿܛܹܐ ܝܘܸܢ ܕܲܝܘܹ̈ܐ. 19ܘܐܸܢ ܐܵܢܵܐ ܒܒܥܸܠܙܒ̣ܘܿܒ̣ ܦܵܠܘܿܛܹܐ ܝܘܸܢ ܕܲܝܘܹ̈ܐ: ܒܢܘܿܢܵܘ̈ܟ̣ܘܿܢ ܒܡܵܢܝܼ ܟܹܐ ܦܵܠܛܝܼ: ܣܵܒܵܒ ܕܐܵܗܵܐ ܐܵܢܝܼ ܒܸܬ ܗܵܘܝܼ ܐܸܠܵܘܟ̣ܘܿܢ ܕܲܝܵܢܹ̈ܐ. 20ܐܝܼܢܵܐ ܐܸܢ ܒܸܨܒܥܵܐ ܕܐܲܠܵܗܵܐ ܦܵܠܘܿܛܹܐ ܝܘܸܢ ܕܲܝܘܹ̈ܐ: ܒܲܣ ܩܘܼܪܒܸܢܵܗ̇ ܐܸܠܵܘܟ̣ܘܿܢ ܡܲܠܟܘܼܬܹܗ ܕܐܲܠܵܗܵܐ. 21ܐܝܼܡܲܢ ܕܙܲܪܒܵܢܵܐ ܟ̰ܘܼܟܒܸܢܵܐ ܢܵܛܸܪ ܕܵܪܬܹܗ: ܒܫܲܝܢܵܐ ܝܠܹܗ ܡܸܢܕܝܹܗ. 22ܐܝܼܢܵܐ ܐܝܼܡܲܢ ܕܐܵܬܹܐ ܡ̇ܢ ܕܒܘܼܫ ܙܲܪܒܵܢܵܐ ܝܠܹܗ ܡܸܢܹܗ ܘܓ̣ܵܠܸܒ ܠܹܗ: ܟܠܹܗ ܟ̰ܲܟܹܗ ܟܹܐ ܫܵܩܸܠ: ܗ̇ܘ ܕܝܼܗ݇ܘܵܐ ܒܗܹܒ̣ܝܼ ܥܲܠܘܼܗܝ: ܘܣܠܵܒܬܹܗ ܟܹܐ ܦܲܠܹܗ. 23ܡ̇ܢ ܕܠܵܐ ܗܵܘܹܐ ܥܲܡܝܼ ܠܕܲܪܩܘܼܒ̣ܠܝܼ ܝܠܹܗ: ܘܡ̇ܢ ܕܠܵܐ ܓ̰ܲܡܸܥ ܥܲܡܝܼ ܒܲܪܒܘܼܙܹܐ ܟܹܐ ܒܲܪܒܸܙ. 24ܪܘܼܚܵܐ ܛܲܡܹܐܐ ܐܝܼܡܲܢ ܕܦܵܠܛܵܐ ܡ̣ܢ ܐ݇ܢܵܫܵܐ: ܟܹܐ ܚܵܕܪܵܐ ܒܕܘܼܟܵܢܹ̈ܐ ܕܡ̈ܝܼܵܐ ܠܲܝܬ ܒܝܼܵܝܗܝ: ܒܸܛܲܥܝܵܐ ܠܢܝܵܚܵܐ: ܘܟܲܕ ܠܵܐ ܡܲܫَܟ̰ܚܵܐ: ܟܹܐ ܐܵܡܪܵܐ: ܒܸܬ ܕܵܝܪܵܢ ܠܒܲܝܬܝܼ ܡܐܲܝܟܵܐ ܕܦܠܸܛܠܝܼ. 25ܘܟܲܕ ܐܵܬܝܵܐ: ܟܹܐ ܡܲܫَܟ̰ܚܵܐ ܠܹܗ ܟܢܝܼܫܵܐ ܘܣܘܼܩܠܵܐ. 26ܗ̇ܝܓܵܗ ܟܹܐ ܐܵܙܵܠَܐ ܠܵܒܠܵܐ ܫܲܒܲܥ ܪ̈ܘܼܚܹܐ ܐ݇ܚܹܪ̈݇ܢܹܐ ܒܘܼܫ ܒܝܼܫܹ̈ܐ ܡ̣ܢ ܓܵܢܘܼܗ̇: ܘܟܹܐ ܥܵܒܼܪܝܼ ܘܥܵܡܪܝܼ ܬܵܡܵܐ: ܘܟܹܐ ܗܵܘܝܵܐ ܚܲܪܬܹܗ ܕܗ̇ܘ ܐ݇ܢܵܫܵܐ ܒܘܼܫ ܚܸܪܒܵܐ ܡ̣ܢ ܩܵܕَܡܵܝܬܹܗ. 27ܘܟܲܕ ܐܲܢܹܐ ܗܲܡܙܘܼܡܹܐ ܗ݇ܘܵܐ: ܡܘܼܪܸܡܠܵܗ̇ ܚܕܵܐ ܒܲܟ̣ܬܵܐ ܩܵܠܘܼܗ̇ ܡ̣ܢ ܟܸܢܫܵܐ: ܘܐَܡܝܼܪܵܗ̇ ܐܸܠܹܗ: ܛܘܼܒ̣ܵܐ ܠܟܹܪَܣܵܐ ܕܩܲܡ ܛܵܥܢܵܐ ܠܘܼܟܼ: ܘܠܒܸܙܵܙܹ̈ܐ ܕܡܸܨܠܘܼܟܼ. 28ܐܵܡܸܪ ܗ̇ܘ: ܐܝܼܢܵܐ ܙܵܘܕܵܐ: ܛܘܼܒ̣ܵܐ ܠܐܵܢܝܼ ܕܫܵܡܥܝܼ ܗܹܡܸܙܡܵܢ ܕܐܲܠܵܗܵܐ ܘܢܵܛܪܝܼ ܠܵܗ̇. 29ܘܟܲܕ ܒܸܓ̰ܡܲܥܝܵܐ ܗ݇ܘܵܘ ܟܸܢܫܹ̈ܐ: ܫܘܼܪܹܐܠܹܗ ܠܹܐܡܵܪܵܐ: ܐܵܗܵܐ ܐܘܼܓ̰ܵܓ̣ ܒܝܼܫܬܵܐ ܝ݇ܠܵܗ̇: ܢܝܼܫܲܢܩܵܐ ܒܸܒܥܵܝܵܐ ܝ݇ܠܵܗ̇: ܘܢܝܼܫܲܢܩܵܐ ܠܹܐ ܦܵܐܹܫ ܝܘܼܗَܒ̣ܵܐ ܐܸܠܵܗ̇: ܫܒ̣ܘܿܩ ܡ̣ܢ ܢܝܼܫܲܢܩܹܗ ܕܝܵܘܢܵܢ. 30ܣܵܒܵܒ ܕܵܐܟ̣ܝܼ ܕܗَܘܹܐܠܹܗ ܝܵܘܢܵܢ ܢܝܼܫܲܢܩܵܐ ܠܢܝܼܢܘܵܝܹ̈ܐ: ܗܲܕܟ̣ܵܐ ܒܸܬ ܗܵܘܹܐ ܐܘܼܦ ܒܪܘܿܢܹܗ ܕܐ݇ܢܵܫܵܐ ܠܐܵܗܵܐ ܐܘܼܓ̰ܵܓ̣. 31ܡܲܠܟܬܵܐ ܕܬܲܝܡܢܵܐ ܒܸܬ ܩܵܝܡܵܐ ܒܕܝܼܘܵܢ ܥܲܡ ܐ݇ܢܵܫܹ̈ܐ ܕܐܵܗܵܐ ܐܘܼܓ̰ܵܓ̣: ܘܒܸܬ ܥܵܒ̣ܕܵܐ ܠܗ݇ܘܿܢ ܓܘܼܢܗܟܵܪ: ܣܵܒܵܒ ܕܐَܬܹܐܠܵܗ̇ ܡ̣ܢ ܡܲܪ̈ܙܵܢܹܐ ܕܐܲܪܥܵܐ ܕܫܵܡܥܵܐ ܥܵܩܸܠܕܵܪܘܼܬܹܗ ܕܫܠܹܝܡܘܿܢ: ܘܗܵܐ: ܕܒܘܼܫ ܓܘܪܵܐ ܡ̣ܢ ܫܠܹܝܡܘܿܢ ܠܲܐܟ̣ܵܐ. 32ܐ݇ܢܵܫܹ̈ܐ ܢܝܼܢܘܵܝܹ̈ܐ ܒܸܬ ܩܵܝܡܝܼ ܒܕܝܼܘܵܢ ܥܲܡ ܕܐܵܗܵܐ ܐܘܼܓ̰ܵܓ̣: ܘܒܸܬ ܥܵܒ̣ܕܝܼ ܠܵܗ̇ ܓܘܼܢܵܗܟܵܪ: ܣܵܒܵܒ ܕܬܘܼܘܸܒܠܗܘܿܢ ܒܟܵܪܘܿܙܘܼܬܹܗ ܕܝܵܘܢܵܢ: ܘܗܵܐ: ܕܒܘܼܫ ܓܘܼܪܵܐ ܡ̣ܢ ܝܵܘܢܵܢ ܠܲܐܟ̣ܵܐ. 33ܐ݇ܢܵܫܵܐ ܠܹܐ ܬܵܦܹܐ ܫܪܵܝܵܐ ܘܡܲܬܸܒ̣ ܠܵܗ̇ ܒܛܸܫܘܵܐ: ܝܲܢ ܬܚܘܿܬ ܣܲܐܬܵܐ: ܐܸܠܵܐ ܥܲܠ ܟ̰ܪܲܚܦܝܼ: ܕܐܵܢܝܼ ܕܥܵܒܼܪܝܼ ܚܵܙܝܼ ܒܲܗܪܘܼܗ̇. 34ܫܪܵܝܵܐ ܕܦܲܓ̣ܪܵܐ ܥܲܝܢܘܼܟ ܝ݇ܠܵܗ̇: ܐܝܼܡܲܢ ܗܲܕܟ̣ܵܐ ܥܲܝܢܘܼܟ ܦܫܝܼܛܬܵܐ ܝ݇ܠܵܗ̇: ܐܘܼܦ ܟܠܹܗ ܦܲܓ̣ܪܘܼܟ ܒܲܗܪܵܢܵܐ ܝܠܹܗ. ܐܝܼܢܵܐ ܐܸܢ ܗܵܘܝܵܐ ܒܝܼܫܬܵܐ: ܘܐܘܼܦ ܦܲܓ̣ܪܘܼܟ ܚܸܫܟܵܢܵܐ ܝܠܹܗ. 35ܗَܘܝܼ ܗܸܫܝܵܪ ܗܲܕܟ̣ܵܐ ܕܒܲܗܪܵܐ ܕܒܝܼܘܼܟ ܠܵܐ ܗܵܘܹܐ ܚܸܫܟܵܐ. 36ܐܸܢ ܗܲܕܟ̣ܵܐ ܟܠܹܗ ܦܲܓ̣ܪܘܼܟ ܒܲܗܪܵܢܵܐ ܝܠܹܗ: ܘܠܲܝܬ ܒܝܹܗ ܣܵܡܵܐ ܡܸܢܕܝܼ ܚܸܫܟܵܐ: ܒܸܬ ܗܵܘܹܐ ܟܠܹܗ ܒܲܗܪܵܢܵܐ: ܐܲܝܟܼ ܕܟܲܕ ܫܪܵܝܵܐ ܒܫܲܦ̮ܩܘܼܗ̇ ܟܹܐ ܒܲܗَܪܸܢܵܗ̇ ܠܘܼܟܼ. 37ܘܟܲܕ ܗܲܡܙܘܼܡܹܐ ܗ݇ܘܵܐ: ܒܸܥܠܹܗ ܡܸܢܹܗ ܚܲܕَ ܦܪܝܼܫܵܐ ܕܐܵܟܼܸܠ ܗ݇ܘܵܐ ܫܵܪܘܼܬܵܐ ܠܟܸܣܠܹܗ: ܘܥܒܸܪܹܗ ܝܬܸܒ̣ܠܹܗ ܠܹܐܟ̣ܵܠܵܐ. 38ܐܝܼܢܵܐ ܗ̇ܘ ܦܪܝܼܫܵܐ ܟܲܕ ܚܙܹܐܠܹܗ: ܥܘܼܓ̰ܸܒܠܹܗ ܕܩܵܕَܡܵܝܬܵܐ ܠܵܐ ܚܘܼܠܸܠܹܗ ܡ̣ܢ ܩܵܕَܡ ܫܵܪܘܼܬܹܗ. 39ܐܝܼܢܵܐ ܐَܡܝܼܪܹܗ ܐܸܠܹܗ ܡܵܪܲܢ: ܐܵܕܝܼܵܐ ܐܲܚܬܘܿܢ ܦܪ̈ܝܼܫܹܐ ܒܵܬ݇ܪܹܗ ܕܟܵܣܵܐ ܘܕܛܲܫܬ ܟܹܐ ܕܵܟ̣ܝܼܬܘܿܢ: ܐܝܼܢܵܐ ܓܵܘܵܘܟ̣ܘܿܢ ܡܸܠܝܵܐ ܝܠܹܗ ܟ̰ܠܵܓ̰ܵܐ ܘܒܝܼܫܬܵܐ. 40ܝܵܐ ܟܝܼܡ ܗܵܘܢܵܐ: ܠܹܐ ܗ݇ܘܵܐ ܡ̇ܢ ܕܥܒܸܕܠܹܗ ܠܒܲܪܵܝܝܼ ܐܘܼܦ ܠܓܵܘܵܝܝܼ ܥܒܸܕܠܹܗ. 41ܐܝܼܢܵܐ ܡܸܢܕܝܼ ܕܐܝܼܬ ܗܲܒَܠܘܿܢ ܠܹܗ ܒܐܸܪܘܵܢܵܐ: ܘܗܵܐ: ܟܠ ܡܸܢܕܝܼ ܕܸܟ̣ܝܵܐ ܝܠܹܗ ܐܸܠܵܘܟ̣ܘܿܢ. 42ܐܸܠܵܐ ܘܵܝ ܐܸܠܵܘܟ̣ܘܿܢ ܦܪ̈ܝܼܫܹܐ: ܣܵܒܵܒ ܕܟܹܐ ܝܵܗܒ̣ܝܼܬܘܿܢ ܡܲܥܣܵܪܹ̈ܐ ܢܲܥܢܵܐ ܘܦܸܓ̣ܢܵܐ ܘܟܠ ܝܸܩܢܵܐ: ܘܟܹܐ ܥܵܒ̣ܪܝܼܬܘܿܢ ܥܲܠ ܕܝܼܘܵܢ ܘܥܲܠ ܚܘܼܒܵܐ ܕܐܲܠܵܗܵܐ. ܐܝܼܢܵܐ ܐܲܢܹܐ ܘܵܓ̰ܸܒ ܝܼܗ݇ܘܵܐ ܕܥܵܒ̣ܕܝܼܬܘܿܢ ܗ݇ܘܵܘ: ܘܐܵܢܝܼ ܠܵܐ ܫܵܒ̣ܩܝܼܬܘܿܢ ܗ݇ܘܵܘ. 43ܘܵܝ ܐܸܠܵܘܟ̣ܘܿܢ ܦܪ̈ܝܼܫܹܐ: ܣܵܒܵܒ ܕܟܹܐ ܡܲܚܸܒܝܼܬܘܿܢ ܪܹܫܵܐ ܕܡܵܘܬܒܹ̈ܐ ܒܟܢܘܼܫܝܵܬܹ̈ܐ: ܘܫܠܵܡܵܐ ܒܫܘܼܩܹ̈ܐ. 44ܘܵܝ ܐܸܠܵܘܟ̣ܘܿܢ: ܣܵܒܵܒ ܐܲܝܟܼ ܩܲܒ̣ܪܹ̈ܐ ܝܬܘܿܢ ܕܠܹܐ ܝܢܵܐ ܡܘܼܒܝܸܢܹܐ؛ ܘܐ݇ܢܵܫܹ̈ܐ ܟܹܐ ܚܵܕܪܝܼ ܥܲܠܵܝܗܝ ܘܠܹܐ ܝܵܕܥܝܼ. 45ܘܓ̰ܘܼܘܸܒܠܹܗ ܚܲܕَ ܡ̣ܢ ܫܲܪܥܲܬܟܵܪܹ̈ܐ ܘܐَܡܝܼܪܹܗ ܐܸܠܹܗ: ܡܲܠܦܵܢܵܐ: ܟܲܕ ܐܲܢܹܐ ܒܹܐܡܵܪܵܐ ܝܘܸܬ ܘܐܘܼܦ ܐܸܠܲܢ ܡܲܒܨܘܼܪܹܐ ܝܘܸܬ. 46ܘܐَܡܝܼܪܹܗ: ܐܘܼܦ ܐܸܠܵܘܟ̣ܘܿܢ ܫܲܪܥܲܬܟܵܪܹ̈ܐ ܘܵܝ: ܣܵܒܵܒ ܕܟܹܐ ܡܲܛܥܸܢܝܼܬܘܿܢ ܠܒܢܲܝ̈ܢܵܫܵܐ ܟܵܪ̈ܵܬܹܐ ܝܵܩܘܿܪܹ̈ܐ: ܘܐܲܚܬܘܿܢ ܒܚܕܵܐ ܡ̣ܢ ܨܸܒܥܵܬܵܘ̈ܟ̣ܘܿܢ ܠܹܐ ܕܵܩܪܝܼܬܘܿܢ ܒܐܵܢܝܼ ܟܵܪ̈ܵܬܹܐ. 47ܘܵܝ ܐܸܠܵܘܟ̣ܘܿܢ: ܣܵܒܵܒ ܕܟܹܐ ܒܵܢܹܬܘܿܢ ܩܲܒ̣ܪ̈ܵܘܵܬܹܐ ܕܢܒ̣̈ܝܹܐ: ܕܒܵܒܵܘܵܬܵܘ̈ܟ̣ܘܿܢ. 48ܗܲܕܟ̣ܵܐ ܣܵܗܕܹ̈ܐ ܝܬܘܿܢ ܘܪܵܙܝܼ ܝܬܘܿܢ ܒܦܘܼܠܚܵܢܹ̈ܐ ܕܒܵܒܵܘܵܬܵܘ̈ܟ̣ܘܿܢ: ܕܐܵܢܝܼ ܩܛܝܼܠܵܝܠܗܘܿܢ: ܘܐܲܚܬܘܿܢ ܟܹܐ ܒܵܢܹܬܘܿܢ ܩܲܒ̣ܪ̈ܵܘܵܬܵܝܗܝ. 49ܣܵܒܵܒ ܕܐܵܗܵܐ ܐܘܼܦ ܥܵܩܸܠܕܵܪܘܼܬܵܐ ܕܐܲܠܵܗܵܐ ܐ݇ܡܸܪܵܗ̇: ܐܵܢܵܐ ܒܸܬ ܫܵܕܪܵܢ ܠܟܸܣܠܵܝܗܝ ܢܒ̣̈ܝܹܐ ܘܫܠܝܼܚܹ̈ܐ: ܡܸܢܵܝܗܝ ܒܸܬ ܛܵܪܕܝܼ ܘܒܸܬ ܩܵܛܠܝܼ. 50ܕܦܵܐܹܫ ܛܠܝܼܒܵܐ ܕܸܡܵܐ ܕܟܠܵܝܗܝ ܢܒ̣̈ܝܹܐ: ܕܦܸܫܠܹܗ ܫܘܼܦܟ̣ܵܐ ܡ̣ܢ ܒܸܢܝܲܬ ܕܥܵܠܡܵܐ: ܡܐܵܗܵܐ ܐܘܼܓ̰ܵܓ̣. 51ܡ̣ܢ ܕܸܡܹܗ ܕܗܵܒܹܝܠ ܗܲܠ ܕܸܡܹܗ ܕܙܲܟܪܝܵܐ: ܗ̇ܘ ܕܦܸܫܠܹܗ ܩܛܝܼ݇ܠܵܐ ܒܹܝܠ ܗܲܝܟܠܵܐ ܠܡܲܕܒܚܵܐ: ܗܹܐ: ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܒܸܬ ܦܵܐܹܫ ܛܠܝܼܒܵܐ ܡܐܵܗܵܐ ܐܘܼܓ̰ܵܓ̣. 52ܘܵܝ ܐܸܠܵܘܟ̣ܘܿܢ ܫܲܪܥܲܬܟܵܪܹ̈ܐ: ܕܫܩܸܠܵܘܟ̣ܘܿܢ ܩܕܝܼܠܹܗ ܕܝܕܸܥܬܵܐ: ܐܲܚܬܘܿܢ ܠܵܐ ܥܒܸܪܵܘܟܼܘܿܢ؛ ܘܠܐܵܢܝܼ ܕܒܸܥܒܼܵܪܵܐ ܗ݇ܘܵܘ ܡܘܼܟܠܹܠܵܘܟ̣ܘܿܢ. 53ܘܟܲܕ ܦܠܸܛܠܹܗ ܡ̣ܢ ܬܵܡܵܐ: ܫܘܼܪܹܠܗܘܿܢ ܣܵܦܪܹ̈ܐ ܘܦܪ̈ܝܼܫܹܐ ܠܸܚܠܵܨܘܼܗܝ ܪܵܒܵܐ: ܘܠܦܵܠܘܿܛܹܐ ܡܸܢܹܗ ܚܲܒܪܵܐ ܥܲܠ ܪܵܒܵܐ ܡܸܢܕܝܼܵܢܹ̈ܐ. 54ܘܥܵܒ̣ܕܝܼ ܗ݇ܘܵܘ ܒܘܼܨܵܐ ܐܸܠܹܗ: ܟܲܕ ܒܵܥܝܼ ܗ݇ܘܵܘ ܠܸܕܒ̣ܵܩܵܐ ܡܸܢܕܝܼ ܡ̣ܢ ܦܘܼܡܹܗ.